میکے سے واپس نہ آنے پر شوہر نے مبینہ طور پر بیوی کی ناک کاٹ دی

(17 ستمبر 2026): شوہر نے میکے سے واپس آنے سے انکار پر بیوی کی ناک دانتوں سے کاٹ کر الگ کر دی جبکہ اپنے سسر کو بھی تشدد کا نشانہ بنایا۔

افسوسناک واقعہ بھارتی ریاست تلنگانہ کے شہر منچیریل میں پیش آیا۔ متاثرہ خاتون کی شناخت ممتا کے نام سے ہوئی جو وارنگل کے ایم جی ایم اسپتال میں زیرِ علاج ہیں۔

منڈل ہیڈ کوارٹر کی رہائشی ممتا کی شادی تقریباً 9 سال قبل ملا گاؤں کے رہنے والے مانی چندر سے ہوئی تھی، جوڑے کی دو بیٹیاں ہیں۔

یہ بھی پڑھیں: بیٹی کی پسند کی شادی سے ناراض اہلخانہ نے داماد کی ناک کاٹ دی

میاں بیوی کے درمیان کچھ عرصے سے ازدواجی مسائل چل رہے تھے۔ واقعے سے تقریباً 10 دن پہلے دونوں کے درمیان جھگڑا ہوا جس پر بیوی شوہر کو چھوڑ کر میکے چلی گئی۔ مانی چندر واپسی کا مطالبہ کرتا رہا لیکن ممتا نے متعدد بار انکار کیا۔

پیر کے روز مانی چندر اپنے سسرال پہنچا اور ممتا کے والد نارائنہ سے بحث شروع کر دی۔ جھگڑے کے دوران اس نے سسر پر ڈنڈے سے حملہ کر دیا جس سے ان کے سر میں شدید چوٹ آئی اور بہت زیادہ خون بہنے لگا۔

جب ممتا نے بیچ بچاؤ کیلیے قدم بڑھایا تو مانی چندر نے ان پر بھی حملہ کر دیا اور دانتوں سے ناک کاٹ کر ایک حصہ الگ کر دیا۔

گھر والوں اور اہل محلہ نے نارائنہ اور ممتا کو فوری طور پر اسپتال منتقل کیا جہاں وہ زیرِ علاج ہیں۔

پولیس نے واقعے کی تصدیق کرتے ہوئے ملزم مانی چندر کے خلاف مقدمہ درج کر لیا۔ پولیس حکام نے بتایا کہ ملزم کو گرفتار کر لیا جس سے مزید تفتیش جاری ہے۔