پاکستانی چاول کی ایکسپورٹ میں زبردست اضافہ، ریکارڈ سطح پر پہنچ گئیں

کراچی : چاول کی ایکسپورٹ میں زبردست اضافہ ہوا اور 2 ماہ کی ایکسپورٹ ریکارڈ سطح پر پہنچ گئیں۔

پاکستان سے چاول کی برآمدات میں بے مثال اضافہ دیکھنے میں آیا ہے، جہاں رواں مالی سال کے ابتدائی دو ماہ کے دوران چاول کی ایکسپورٹ ریکارڈ سطح پر پہنچ گئی ہے۔

کراچی سے جاری کردہ رپورٹس میں بتایا گیا اگست کے مہینے میں چاول کی کل برآمدات 22 فیصد اضافے کے ساتھ 3 لاکھ 8 ہزار ٹن ریکارڈ کی گئیں۔

باسمتی چاول کی ایکسپورٹ میں 58 فیصد کا نمایاں اضافہ ہوا، جس کے بعد اس کا حجم 78 ہزار ٹن ہو گیا جبکہ دیگر اقسام کے چاول کی برآمدات بھی 14 فیصد بڑھ کر 2 لاکھ 31 ہزار ٹن تک پہنچ گئیں۔

اگست میں چاول کی برآمدی مالیت میں 31 فیصد اضافہ دیکھا گیا، جس سے کل آمدن 19 کروڑ 20 لاکھ ڈالر رہی۔

اس میں باسمتی چاول کا شیئر نمایاں رہا، جس کی برآمدی آمدن 70 فیصد اضافے کے ساتھ 8 کروڑ 80 لاکھ ڈالر تک پہنچ گئی۔

مجموعی طور پر سال کے ابتدائی دو مہینوں میں چاول کی ایکسپورٹ کا حجم 20 فیصد اضافے کے ساتھ 6 لاکھ 55 ہزار ٹن ہو گیا ہے، جو تاریخ کی بلند ترین سطح ہے۔

اس عرصے کے دوران باسمتی چاول کی برآمدات میں 43 فیصد جبکہ دیگر اقسام کے چاول کی برآمدات میں 15 فیصد کا اضافہ ریکارڈ کیا گیا۔