پاکستانی اداکارہ و ماڈل حرا خان نے صبا فیصل کے حالیہ متنازع بیان پر انہیں آڑے ہاتھوں لے لیا۔
حرا خان نے انسٹاگرام اسٹوری پر صبا فیصل کے بیان کے ردِعمل میں لکھا ہے کہ ‘جنازے اٹھانے سے بہتر ہے کہ والدین اپنے سر جھکالیں’۔
انہوں نے کہا کہ ‘میں پہلے بھی یہ بات کہہ چکی ہوں اور دوبارہ کہتی ہوں کہ صبا فیصل کو مدد کی ضرورت ہے‘۔
دوسری جانب اداکارہ زویا ناصر نے بھی اس حوالے سے سوشل میڈیا پوسٹ پر تبصرہ کرتے ہوئے لکھا ہے کہ ‘میرے پاس کہنے کو بہت کچھ ہے، یہ کتنا خطرناک اور پیچیدہ بیانیہ ہے’۔
حرا خان اور زویا ناصر کا یہ ردِعمل اس ویڈیو کے بعد سامنے آیا ہے جس میں صبا فیصل طلاق کے حوالے سے بدلتے ہوئے معاشرتی رویوں پر بات کرتی نظر آئیں۔
صبا فیصل نے ماضی کا ذکر کرتے ہوئے کہا تھا کہ پہلے طلاق کو پورے خاندان کے لیے انتہائی تکلیف دہ واقعہ سمجھا جاتا تھا، خاندان طویل عرصے تک یہ سوچتا تھا کہ آخر کیا غلط ہوا جب کہ بیٹی کی شادی ختم ہونے پر والد بھی شدید شرمندگی محسوس کرتے تھے اور لوگوں کا سامنا بھی نہیں کر پاتے تھے۔
اداکارہ نے ماضی کے اس رویے کا آج کے حالات سے موازنہ کرتے ہوئے کہا تھا کہ اب بعض معاملات میں طلاق کو زیادہ معمولی انداز میں لیا جاتا ہے، ایک طلاق یافتہ خاتون بیرونِ ملک سفر کر کے ذہن صاف کرنے اور اپنی زندگی آگے بڑھانے کی بات کرتی ہے۔
صبا فیصل کے بیان کے بعد سوشل میڈیا پر شادی، طلاق، خاندانی توقعات اور بدلتے ہوئے معاشرتی رویوں پر بحث شروع ہو گئی۔
By
By
