مصنوعی ذہانت کو ہتھیاروں کی دوڑ کا ایک اور میدان بننے سے روکنا ہوگا: اسحاق ڈار

نائب وزیر اعظم اسحاق ڈار نے کہا ہےکہ مصنوعی ذہانت کو ہتھیاروں کی دوڑ کا ایک اور میدان بننے سے روکنا ہوگا۔

اقوام متحدہ کی سلامتی کونسل میں مصنوعی ذہانت اور عالمی سلامتی پر اجلاس ہوا جس میں پاکستان نے بھی شرکت کی۔

نائب وزیراعظم نے سلامتی کونسل اجلاس میں پاکستان کا مؤقف پیش کیا اور کہا مصنوعی ذہانت کے ڈیزائن، ترقی اور استعمال میں انسانی فیصلہ سازی اورکنٹرول برقرار رہنا چاہیے۔
اسحاق ڈار نے کہا کہ فوجی شعبے میں غلط اندازوں اور مختصر وقت میں فیصلوں کے خطرات سے نمٹنےکے لیے احتیاط اور اعتماد سازی ضروری ہے،  اے آئی کی ترقی کی رفتار کو برقرار رکھنے کے نام پر ٹیکنالوجی تک رسائی محدود نہیں ہونی چاہیے، مصنوعی ذہانت کی حکمرانی کے لیے اقوام متحدہ کے تحت جامع اور نمائندہ فورمز ضروری ہیں، جنیوا میں اقوام متحدہ کے پہلے گلوبل ڈائیلاگ آن اے آئی گورننس کا خیرمقدم کرتے ہیں۔

نائب وزیراعظم کا کہنا تھا کہ مصنوعی ذہانت کو ہتھیاروں کی دوڑ کا ایک اور میدان بننے سے روکنا ہوگا، پاکستان مصنوعی ذہانت کے عالمی تعاون، عالمی اے آئی تقسیم ختم کرنے کے لیے پرعزم ہے، مصنوعی ذہانت تک مساوی رسائی امن اور ترقی کے لیے ضروری ہے، پاکستان عالمی مصنوعی ذہانت تعاون تنظیم WAICO کا بانی رکن ہے۔