ایجبسٹن میں پاکستان کا ٹیسٹ ریکارڈ خراب، کیا قومی ٹیم اس بار فتح حاصل کر پائے گی؟

انگلینڈ اور پاکستان کی کرکٹ ٹیموں کے درمیان سیریز کا آخری اور تیسرا ٹیسٹ واروکشائر کاؤنٹی کے ہوم گراؤنڈ ایجبسٹن میں بدھ سے شروع ہوگا، میزبان ٹیم کو سیریز میں 0-2 کی فیصلہ کن برتری حاصل ہے۔

دلچسپ امر یہ ہے کہ پاکستان کی موجودہ ٹیم میں شامل کس بھی کھلاڑی نے اس میدان پر انگلینڈ کے مقابلے پر ٹیسٹ میچ نہیں کھیلا۔

کپتان بابر اعظم 65، شان مسعود 49 اور فاسٹ بولر محمد عباس پاکستان کے لیے 32 ٹیسٹ کھیلنے کا تجربہ رکھتے ہیں اور انگلینڈ کا ایک سے زیادہ مرتبہ دورہ کر چکے ہیں ،البتہ ان تمام کھلاڑیوں کا ایجبسٹن کرکٹ گراؤنڈ پر یہ پہلا ٹیسٹ میچ ہوگا۔

برمنگھم کے ایجبسٹن کرکٹ گراؤنڈ پر پاکستان اور انگلینڈ کے درمیان اب تک 8 ٹیسٹ کھیلے جا چکے ہیں ،جہاں مکمل طور پر انگلش ٹیم کو پاکستان کے خلاف برتری حاصل ہے۔

اس گراؤنڈ پر پاکستان نے پہلا ٹیسٹ مئی جون 1962 کو جاوید برکی کی قیادت میں کھیلا تھا،جہاں ٹیڈ ڈیکسٹر کی قیادت میں کھیلنے والی انگلش ٹیم نے پاکستان کو اننگز اور 24 رنز سے شکست دی تھی۔

جون 1971 میں انتخاب عالم کی قیادت میں انگلینڈ اور پاکستان کا ٹیسٹ ڈرا رہا تھا۔ پاکستان نے پہلی اننگز میں 195 اوورز میں 7 وکٹ پر 608 رنز بنائے تھے۔ اس ٹیسٹ میں ظہیر عباس نے 467 گیندوں پر 274 رنز کی اننگز کھیلی تھی،جو اس میدان پر کسی بھی پاکستانی بیٹر کا سب سے بڑا اسکور ہے۔

واضح رہے کہ پاکستان اور انگلینڈ کے درمیان سیریز کا تیسرا ٹیسٹ 9 ستمبر سے برمنگھم کے ایجبسٹن کرکٹ گراؤنڈ میں کھیلا جائے گا۔