بہاولپور کے حلقے این اے 168 میں ضمنی الیکشن کے لیے پولنگ آج ہوگی، انتخابی سامان کی ترسیل کا کام مکمل کرلیا گیا۔
ریٹرننگ آفیسر (آر او) کے مطابق قومی اسمبلی کی نشست پر الیکشن کےلیے پولنگ صبح 8 بجے سے بغیر کسی وقفے کے شام 5 بجے تک جاری رہے گی۔
مسلم لیگ ن کے امیدوار منیر اقبال چُنڑ اور آزاد امیدوار ولی داد چیمہ میں مقابلہ ہے، دیگر 18 امیدوار بھی مدمقابل ہیں۔
یہ نشست ملک اقبال چُنڑ کی وفات سے خالی ہوئی، ان کے صاحبزادے منیر اقبال چُنڑ کو مسلم لیگ ن کے ساتھ ساتھ پیپلز پارٹی کی حمایت بھی حاصل ہے جبکہ آزاد امیدوار ولی داد چیمہ کی حمایت ان کے والد رکن قومی اسمبلی طارق بشیر چیمہ کر رہے ہیں۔
ترجمان الیکشن کمیشن کے مطابق اس حلقے میں کل رجسٹرڈ ووٹرز کی تعداد 4 لاکھ 63 ہزار 143 ہے، ان میں2 لاکھ 48 ہزار 529 مرد جبکہ 2 لاکھ 34 ہزار 614 خواتین شامل ہیں، حلقے میں مجموعی طور پر 292 پولنگ اسٹیشن قائم کئے گئے ہیں جن میں 130 مردانہ، 130 زنانہ اور 32 مشترکہ ہیں۔
307 پریذائیڈنگ افسر جبکہ 941 پولنگ اور اسسٹنٹ پریذائیڈنگ افسران تعینات کئے گئے ہیں۔
یہ حلقہ بہاول پور شہر اور دریائے ستلج کے کچھ دیہی علاقوں پر مشتمل ہے، اس حلقے میں کل 20 امیدوار قسمت آزمائی کر رہے ہیں۔
By
By
