سنگجانی جلسہ کیس: اسد قیصر کی ضمانت قبل از گرفتاری کی درخواست مسترد

اسلام آباد: عدالت نے پی ٹی آئی رہنما اسد قیصر کی سنگجانی جلسہ کیس میں ضمانت قبل از گرفتاری کی درخواست خارج کردی۔

اسلام آباد کی انسداددہشتگردی عدالت کے جج طاہر عباس سِپرا نے اسد قیصر کی جانب سے دائر ضمانت قبل از گرفتاری کی درخواست پر سماعت کی جب کہ انہوں نے عدالت میں حاضری سے استثنیٰ کی درخواست بھی دائر کر رکھی تھی۔
جج طاہر عباس سِپرا نے ریمارکس دیے کہ اسد قیصر آخری دفعہ فروری میں عدالت میں پیش ہوئے تھے اور حاضری سےاستثنیٰ کی درخواست پراسد قیصر کے دستخط بھی نہیں۔

انسداد دہشتگردی عدالت نے اسد قیصر کو حاضری کے لیے عدالت میں پیش ہونے کا حکم دے دیا اور ان کی ضمانت قبل از گرفتاری کی درخواست بھی خارج کردی۔

اسد قیصر کے خلاف دہشتگردی کی دفعات کے تحت تھانا سنگجانی میں مقدمہ درج ہے۔