قومی پہلوان انعام بٹ کیلئے بڑی خوشخبری، ایشین گیمز میں شرکت کی تصدیق

لاہور: قومی پہلوان محمد انعام بٹ کو بڑا ریلیف مل گیا۔

ذرائع کے مطابق محمد انعام بٹ اور انٹرنیشنل ٹیسٹنگ ایجنسی کے درمیان معاہدے کی تفصیل سامنے آگئی۔

ذرائع نے بتایا کہ انٹرنیشنل ٹیسٹنگ ایجنسی نے محمد انعام بٹ کی ایشین گیمز میں شرکت کی تصدیق کردی ہے۔

محمد انعام بٹ پر 2 ماہ کی پابندی 19 جولائی سے 18 ستمبر 2026 تک رہی تاہم اب ان کی پابندی کی مدت مکمل ہو چکی۔
ذرائع کا کہنا ہےکہ انعام بٹ پر کوئی مالی جرمانہ عائد نہیں کیا گیا، نمونے میں پائی جانے والی دوا طبی علاج کے لیے استعمال ہونے کی تصدیق ہوئی ہے اور انٹرنیشنل ٹیسٹنگ ایجنسی نے طبی دستاویزات کو تسلیم کر لیا ہے جب کہ مطلوبہ دوا مزید ایک سال استعمال کرنے کی اجازت بھی دی گئی ہے۔

دوسری جانب ایشین بیچ گیمزکے مقابلے کا نتیجہ منسوخ ہوگیا ہے جس پر چاندی کا تمغہ بھی واپس لے لیا گیا ہے۔

قومی پہلوان ایشین گیمز میں کوچ کی حیثیت سے شرکت کریں گے جب کہ انعام بٹ ریسلنگ فیڈریشن کے سیکرٹری ہیں اور تمام سرگرمیوں میں حصہ لینے کے اہل ہیں۔