لندن سے بنگلادیش جانے والی پرواز میں مسافروں کے درمیان جھگڑا، ویڈیو وائرل

لندن سے بنگلادیش جانے والی پرواز میں دو مسافر لڑ پڑے جس کی ویڈیو سوشل میڈیا پر وائرل ہوگئی۔

سوشل میڈیا پر ویڈیو وائرل ہورہی ہے جس میں بیمان بنگلہ دیش ایئر لائنز کی پرواز کے دوران دو مسافروں کو آپس میں لڑتے ہوئے دیکھا جا سکتا ہے۔

یہ واقعہ اس وقت پیش آیا جب طیارہ لندن سے بنگلہ دیش جا رہا تھا اور دونوں مسافروں کے درمیان ہونے والی بحث و تکرار جلد ہی ہاتھا پائی میں بدل گئی۔

اس واقعے کے باعث طیارے میں سوار دیگر مسافروں بشمول بچوں اور بزرگوں میں خوف و ہراس پھیل گیا۔

ویڈیو میں دونوں افراد کو پہلے بحث کرتے اور پھر ایک دوسرے پر ہاتھ اٹھاتے ہوئے دیکھا جا سکتا ہے، لڑائی کے دوران ایک مسافر کی ٹی شرٹ بھی پھٹ گئی۔

بعد ازاں کیبن کریو کے ارکان اور دیگر مسافروں نے مداخلت کی اور دونوں افراد کو الگ کرنے کی کوشش کی۔