مکمل دستاویزات کے باوجود آف لوڈنگ کے کیسز عدالتوں میں پہنچنے لگے

اسلام آباد ہائیکورٹ نے ملائیشیا جانے والے شہری کو ایئرپورٹ پر آف لوڈ کرنے سے متعلق درخواست کی سماعت کے دوران متعلقہ افسر یا شفٹ انچارج کو آئندہ سماعت پر طلب کر لیا۔

جسٹس ایاز شوکت نے شہری محمد سعد کی درخواست پر سماعت کا تحریری حکم نامہ جاری کر دیا۔

درخواست گزار محمد سعد نے ملائیشیا جاتے ہوئے آف لوڈ کیے جانے کے خلاف عدالت سے رجوع کیا ہے۔ درخواست گزار کا مؤقف ہے کہ اس کے پاس ملائیشیا کا ویزہ اور واپسی کا ٹکٹ موجود تھا، اس کے باوجود اسے بیرون ملک جانے سے روک دیا گیا۔

درخواست گزار کے وکیل نے عدالت کو بتایا کہ بیرون ملک سفر کے لیے تمام ضروری دستاویزات مکمل ہونے کے باوجود شہری کو ایئرپورٹ پر آف لوڈ کیا گیا۔ وکیل نے عدالت سے استدعا کی کہ شہری کو آف لوڈ کرنے کے اقدام کو غیر قانونی قرار دیا جائے۔
عدالت نے وفاقی تحقیقاتی ادارے (ایف آئی اے) کو آئندہ سماعت تک درخواست پر پیراوائز کمنٹس جمع کرانے کی ہدایت کر دی۔ عدالت نے حکم دیا کہ 12 اگست کو شہری کو آف لوڈ کرنے کا حکم دینے والا متعلقہ افسر یا شفٹ انچارج آئندہ سماعت پر عدالت میں پیش ہو۔

اسلام آباد ہائیکورٹ نے کیس کی مزید سماعت 4 ستمبر تک ملتوی کر دی۔