شوکت یوسف زئی نے لانگ مارچ مؤخر کرنے کو سیاسی حکمت عملی قرار دے دیا

پشاور: پی ٹی آئی خیبرپختونخوا کے سیکرٹری اطلاعات شوکت یوسف زئی نے لانگ مارچ مؤخر کرنا سیاسی حکمت عملی قرار دے دی۔

ایک بیان میں شوکت یوسفزئی نے کہا کہ وفاقی حکومت کو گھٹنے ٹیکنے پر مجبور کردیں گے، حکومت ٹی وی چینلز پر مذاکرات کرتی ہے، عملی طورپر بات چیت کرے تو پی ٹی آئی تیار ہے، وفاقی حکومت کو مذاکرات پر آنا ہی پڑے گا۔

انہوں نے کہا کہ اٹھارویں ترمیم کے بعد صوبوں کے معاملات میں مداخلت نہیں کی جاسکتی، پولیس ایکٹ صوبے کا اختیار ہے، چاہتے ہیں پولیس آزاد ہو، اس لیے قانون سازی کی۔

شوکت یوسف زئی کا کہنا تھا کہ پی ٹی آئی کا مطالبہ ہے بانی پی ٹی آئی کو عدالتی احکامات کی روشنی میں علاج فراہم کیا جائے۔