پنجاب: امتحان میں خراب نتائج پر ٹیچرز کیخلاف قانونی کارروائی کا فیصلہ

لاہور: وزیراعلیٰ پنجاب مریم نواز نے امتحانات میں خراب نتائج پرٹیچرز کیخلاف قانونی کارروائی کا فیصلہ کیا ہے۔

وزیراعلیٰ پنجاب کی زیرصدارت ویڈیو لنک اجلاس ہوا جس میں مریم نواز نے جماعت نہم کے امتحانی نتائج پر خفگی کا اظہار کیا۔

اجلاس میں  طلبہ کے نتائج کو ٹیچرز کی کارکردگی سے منسلک کرنے پراتفاق کیا گیا جب کہ امتحانات میں خراب نتائج پرٹیچرز کے خلاف قانونی کارروائی کرنے، نیا آرڈیننس لانے اور ہرکلاس میں ماہانہ اور سالانہ امتحان شروع کرنےکا فیصلہ کیا گیا ہے۔

مریم نواز نے اگلے ہفتے مکمل ٹائم لائن، ریفارمز پلان پیش کرنے اور نویں جماعت کے 20 فیصد سے کم رزلٹ پر فوری ایکشن لینے کا بھی حکم دیا۔

دوسری جانب وزیراعلیٰ پنجاب نے بہترین نتائج والے اسکولوں کے لیے انعامات اور سرکاری اسکولوں میں سبجیکٹ اسپیشلسٹ کی تعیناتی یقینی بنانےکی ہدایت کرتے ہوئے کہا کہ 45 دن میں ہیڈ ٹیچرز کی آسامیاں پر کی جائیں۔

اس کے علاوہ تعلیم میں کمزور طلبہ کے لیے ایوننگ کوچنگ، اسکولوں کی مانیٹرنگ کے لیے مانیٹرنگ ایپ متعارف کرانےکا فیصلہ بھی کیا گیا ہے۔

مریم نواز نے آؤٹ سورس اسکولوں کی کارکردگی رپورٹ طلب کرتے ہوئے کہا کہ ٹیچرزکی محنت طلبہ کے نتائج میں نظر آنی چاہیے۔