نوجوان سے زیادتی اور ویڈیو بنانے کا ملزم 2 لاکھ کے مچلکوں عوض ضمانت پر رہا

لاہور: 

17 سالہ نوجوان سے زیادتی اور ویڈیو بنانے کا ملزم 2 لاکھ روپے کے مچلکوں کے عوض رہا کردیا گیا۔

لاہور ہائیکورٹ میں 17 سالہ نوجوان سے مبینہ زیادتی اور ویڈیو بنانے کے مقدمے میں ملزم کی بعد از گرفتاری ضمانت کی درخواست پر سماعت ہوئی، جس میں عدالت نے ملزم کی بعد از گرفتاری ضمانت منظور کرتے ہوئے رہا کرنے کا حکم دے دیا۔

جسٹس محمد وحید خان نے ملزم مبشر کی درخواست پر سماعت کی، جہاں عدالت نے ملزم کی 2 لاکھ مچلکوں کے عوض ضمانت منظور کی۔

درخواست میں مؤقف اختیار کیا گیا کہ ایف آئی آر میں وقوعہ کی تاریخ اور وقت واضح نہیں، مقدمہ تقریباً 5 ماہ کی تاخیر سے درج کیا گیا۔ مدعی کی جانب سے ویڈیو واٹس ایپ گروپ میں شیئر ہونے تک کوئی شکایت نہیں کی گئی۔ مبینہ وقوعہ کا کوئی چشم دید گواہ موجود نہیں ہے۔

درخواست ضمانت میں مزید کہا گیا کہ ملزم کے خلاف جرم سے جوڑنے کے لیے کوئی قابلِ اعتماد مواد ریکارڈ پر موجود نہیں۔ ملزم گرفتاری کے بعد سے جیل میں ہے اور پولیس کو مزید تفتیش کے لیے اس کی ضرورت نہیں۔ شریک ملزم عبدالرحمان کو 25 مئی 2026 کو بعد از گرفتاری ضمانت دی جا چکی ہے۔

واضح رہے کہ سیشن عدالت نے ملزم کی بعد از گرفتاری ضمانت 27 جون 2026 کو خارج کر دی تھی۔ ملزم نے استدعا کی کہ عدالت ملزم کی بعد از گرفتاری ضمانت منظور کر کے رہا کرنے کا حکم دے۔

ملزمان کے خلاف تھانہ کنگن پور میں پولیس نے مقدمہ درج کر رکھا ہے۔