برمنگھم ٹیسٹ: دوسرے روز کا کھیل شروع، انگلینڈ کی پوزیشن مضبوط

برمنگھم میں پاکستان اور انگلینڈ کے درمیان تیسرے ٹیسٹ کے پہلے روز پاکستانی بیٹنگ ایک بار پھر بری طرح ناکام رہی جس کے بعد انگلینڈ نے میچ پر اپنی گرفت مضبوط کرلی۔

پاکستان پہلی اننگز میں صرف 133 رنز پر ڈھیر ہوگیا جس کے جواب میں انگلینڈ نے پہلے دن کے اختتام تک 4 وکٹوں کے نقصان پر 156 رنز بنا کر 23 رنز کی برتری حاصل کرلی۔

آج کھیل کے دوسرے دن کا آغاز ہوگیا ہے اور وکٹ پر ہیری بروک 52 اور ڈین لارنس 5 رنز کے ساتھ موجود ہیں۔

کھیل کا پہلا دن

ایجبسٹن میں انگلینڈ نے ٹاس جیت کر پاکستان کو پہلے بیٹنگ کی دعوت دی تاہم پاکستانی بیٹرز انگلش فاسٹ بولنگ کے سامنے ابتدا ہی سے مشکلات کا شکار رہے۔ 

پاکستان نے پہلے گھنٹے کے دوران صرف 26 رنز پر 4 وکٹیں گنوا دیں جس کے بعد پوری اننگز سنبھل نہ سکی اور تمام کھلاڑی 33.5 اوورز میں 133 رنز پر آؤٹ ہوگئے۔

پاکستان کی جانب سے سعود شکیل نے سب سے زیادہ 43 رنز کی اننگز کھیلی اور کچھ مزاحمت دکھائی جب کہ محمد عباس 21 رنز بنا کر دوسرے نمایاں بیٹر رہے، راجااللہ نے اپنے ڈیبیو ٹیسٹ میں بیٹنگ کرتے ہوئے 11 رنز بنائے۔

کپتان بابراعظم بھی بڑی اننگز کھیلنے میں ناکام رہے اور صرف 7 رنز بنا سکے جب کہ صائم ایوب، اذان اویس، عبداللہ شفیق اور شان مسعود بھی انگلش بولنگ کے سامنے زیادہ دیر نہ ٹھہرسکے۔

انگلینڈ کی جانب سے جوش ٹنگ نے شاندار بولنگ کرتے ہوئے 42 رنز کے عوض 4 وکٹیں حاصل کیں، اولی رابنسن نے 15 رنز دے کر 3 کھلاڑیوں کو آؤٹ کیا جبک ہ جوفرا آرچر نے بھی 3 وکٹیں حاصل کیں، اولی رابنسن نے صائم ایوب کو آؤٹ کرکے ٹیسٹ کرکٹ میں اپنی 100 وکٹیں بھی مکمل کرلیں۔

پاکستان کی جانب سے 133 رنز کی اننگز کے خاتمے کے بعد انگلینڈ نے بیٹنگ شروع کی تو اسے بھی ابتدائی مشکلات کا سامنا کرنا پڑا۔ 

ڈیبیو کرنے والے پاکستانی فاسٹ بولر راضااللہ نے اپنے ٹیسٹ کیریئر کی صرف چوتھی گیند پر تجربہ کار انگلش بیٹر جو روٹ کو بولڈ کرکے پاکستان کو اہم کامیابی دلائی۔ 

فاسٹ بولر راضااللہ نے مجموعی طور پر 2 وکٹیں حاصل کیں جب کہ محمد عباس اور محمد علی نے ایک، ایک کھلاڑی کو باہر کیا۔

تاہم ایمیلیو گے اور ہیری بروک نے شاندار شراکت قائم کرکے انگلینڈ کو مشکلات سے نکال دیا، دونوں بیٹرز کے درمیان 100 سے زائد رنز کی شراکت نے انگلینڈ کی پوزیشن مستحکم کردی، ایمیلیو گے 60 رنز بنا کر آؤٹ ہوئے جب کہ ہیری بروک 52 رنز کے ساتھ وکٹ پر موجود ہیں۔

یوں پہلے روز کا کھیل ختم ہونے پر انگلینڈ نے 39 اوورز کا سامنا کیا اور 4 وکٹوں کے نقصان پر 156 رنز بنا لیے تھے اور اسے پاکستان کے خلاف 23 رنز کی برتری حاصل ہوئی۔

پاکستان پہلے ہی تین ٹیسٹ میچوں کی سیریز میں 0-2 سے شکست کھا چکا ہے اور اب اسے ایجبسٹن ٹیسٹ میں وائٹ واش سے بچنے کے لیے غیر معمولی کارکردگی دکھانا ہوگی۔