چکن گونیا کے کیسز میں اضافہ، نوشہرہ کے متعدد گاؤں متاثر

خیبرپختونخوا میں ضلع نوشہرہ کے علاقے زیارت کاکا صاحب کے متعدد گاؤں میں چکن گونیا کے کیسز میں مسلسل اضافہ ہونے لگا، مختلف ہسپتالوں میں روزانہ 50 سے 100 کیسز رپورٹ ہونے لگے ہیں۔

ذرائع کے مطابق نوشہرہ کے مختلف ہسپتالوں میں روزانہ 50 سے 100 تک چکن گونیا کے کیسز رپورٹ ہو رہے ہیں، جس کے باعث طبی مراکز پر مریضوں کا دباؤ بڑھ گیا ہے، بڑی تعداد میں مریضوں کی آمد کے باوجود ہسپتالوں میں طبی عملے اور دیگر ضروری سہولیات کی کمی کے باعث مریضوں کو مشکلات کا سامنا ہے۔

دوسری جانب متاثرہ علاقوں کے مکینوں نے صورتحال پر تشویش کا اظہار کرتے ہوئے حکومت اور محکمہ صحت سے فوری اقدامات کا مطالبہ کیا ہے، اہلِ علاقہ کا کہنا ہے کہ بیماری کے پھیلاؤ کو روکنے اور متاثرہ افراد کو بروقت علاج کی سہولت فراہم کرنے کے لیے ہنگامی بنیادوں پر اقدامات کیے جائیں۔

اہلِ علاقہ نے مطالبہ کیا ہے کہ چکن گونیا کے بڑھتے ہوئے کیسز کے پیش نظر فوری طور پر ایمرجنسی نافذ کی جائے، ہسپتالوں میں وافر مقدار میں ادویات، اضافی طبی عملہ اور دیگر ضروری سہولیات فراہم کی جائیں۔