مری: بریک فیل ہونے سے اسکول وین میں خوفناک حادثہ، آگ لگنے سے 12 بچے جھلس گئے

مری : نجی اسکول وین کھائی میں گرنے آگ بھڑک اٹھی ، حادثے میں 12 بچے جھلس کر زخ
می ہوگئے۔

تفصیلات کے مطابق مری کے علاقے لوئر موہڑا بڑا ہوتر کے قریب اسکول وین بریک فیل ہونے کے باعث کھائی میں جا گری، جس کے بعد گاڑی میں اچانک آگ بھڑک اٹھی۔

حادثے میں 12 بچے جھلس کر زخمی ہو گئے، اطلاع ملتے ہی ریسکیو ٹیموں نے موقع پر پہنچ کر آگ پر قابو پایا اور بچوں کو گاڑی سے باہر نکال کر سول اسپتال منتقل کیا۔

بعد ازاں، شدید جھلسنے والے 4 بچوں کو مزید بہتر طبی علاج کے لیے راولپنڈی کے ہولی فیملی اسپتال منتقل کر دیا گیا۔
ڈی پی او مری محمد رضا تنویر سپرا نے کہا کہ حادثے میں الحمدللہ کوئی جانی نقصان نہیں ہوا، تاہم واقعے کی تحقیقات کا آغاز کر دیا گیا ہے۔

انہوں نے مزید بتایا کہ مقامی سطح پر چلنے والی اسکول وینز کی فنی حالت کی مزید چیکنگ کی جائے گی۔

دوسری جانب مری میں موجود وزیراعلیٰ پنجاب مریم نواز شریف نے حادثے پر گہرے افسوس کا اظہار کرتے ہوئے واقعے کی رپورٹ طلب کر لی ہے اور انتظامیہ کو تمام زخمی بچوں کو بہترین طبی سہولیات فراہم کرنے کی ہدایت کی ہے۔