ریٹیلرز کیلئے فکسڈ ٹیکس اسکیم ناکام، 10 لاکھ نان فائلرز کیخلاف کریک ڈاؤن کا فیصلہ

اسلام آباد: حکومت نے فکسڈ ٹیکس اسکیم کی ناکامی کے بعد 10 لاکھ نان فائلرز کے خلاف کریک ڈاؤن کا فیصلہ کیا ہے۔ 

فیڈرل بورڈ آف ریونیو (ایف بی آر) کے چیئرمین راشد لنگڑیال نے سینیٹ کمیٹی کو بریفنگ میں کہا کہ ریٹیلرز ٹیکس نیٹ میں نہ آئے تو سخت کارروائی ہوگی۔ 

اس موقع پر وزیر مملکت برائے خزانہ بلال اظہر کیانی نے کہا کہ حکومت کو ’گاجر اور چھڑی‘ کی پالیسی اپنانا ہوگی۔ 

ایف بی آر حکام کے بتایا کہ 43 لاکھ ریٹیلرز میں صرف 6 لاکھ فائلرز ہیں اور 37 لاکھ ٹیکس نیٹ سے باہر ہیں۔ 

ایف بی آر نے ریٹیلرز کی جانب سے ایک فیصد فکسڈ ٹیکس اسکیم کو خاطر خواہ پذیرائی نہ ملنے کا اعتراف کرتے ہوئے کہا کہ انتہائی سازگار قرار دی جانے والی اس اسکیم سے فائدہ نہ اٹھانے والے 10 لاکھ نان فائلرز کے خلاف کریک ڈاؤن شروع کیا جائے گا۔