کراچی: شہر قائد میں ایک اور خاتون کو گھر میں گھس کر گولی مار دی گئی، اسٹیل ٹاؤن کے علاقے گھگھر پھاٹک پل کے قریب واقعے میں 30 سالہ بختاور جاں بحق ہو گئی ہے۔
اہل خانہ نے پولیس کو بیان میں کہا ہے کہ ایک بچی کی ماں بختاور عرف بکھاں زوجہ رسول بخش کو ملزمان نے گھر میں گھس کر گولی مار کر قتل کیا، ملزمان گھر میں ڈکیتی کی نیت سے آئے تھے۔
یہ واقعہ قادر نگر کچی آباد میں پیش آیا، اہل خانہ کے مطابق واقعے کے وقت گھر کے تمام افراد سو رہے تھے اور خاتون جاگ رہی تھی کہ دو ڈاکو چوری کی نیت سے گھر میں داخل ہوئے۔
تاہم دوسری طرف پولیس کا کہنا ہے کہ یہ واقعہ ڈکیتی مزاحمت ہے یا کچھ اور تحقیقات کر رہے ہیں، بہ ظاہر لگتا ہے کہ خاتون نے خودکشی کی ہے، تاہم مقتول کے شوہر اور پڑوسن کا کہنا ہے کہ 2 ڈاکو گھر میں چوری کی نیت سے داخل ہوئے تھے، خاتون کے شور مچانے پر فائرنگ کر کے قتل کیا اور فرار ہو گئے۔
ایس ایچ او اسٹیل ٹاؤن انسپکٹر کا دعویٰ ہے کہ واقعہ گھریلو رنجش کا شاخسانہ ہے، خاتون نے خود اپنی جان لی ہے۔
ذرائع کے مطابق مقتولہ کی شادی تقریباً ڈیڑھ سال قبل ہوئی تھی، اور 20 دن قبل اس کے ہاں بیٹی ہوئی تھی، اس کا آبائی تعلق ٹنڈو محمد خان سے تھا، مقتولہ کا شوہر محنت مزدوری کرتا ہے۔ ذرائع کے مطابق گولی مقتولہ کے سر میں لگی ہے، جب کہ مذکورہ علاقہ جرائم پیشہ افراد کا گڑھ ہے جہاں چوری ڈکیتی سمیت تمام جرائم کی وارداتیں عام ہیں۔
گھر میں گھس کر خواتین کو قتل کرنے کی وارداتیں
یاد رہے کہ گزشتہ ماہ 14 ستمبر کی رات کو سرجانی ٹاؤن سیکٹر7 ڈی کے ایک گھر میں مہوش نامی خاتون کو اس کے 3 چھوٹے بچوں کے ساتھ نہایت سفاکی سے قتل کر دیا گیا تھا، یہ واقعے ذرائع ابلاغ میں تین دن تک چھایا رہا، حتیٰ کہ پولیس نے قاتل کو پکڑ لیا، جو مقتولہ کے شوہر کا بہنوئی ہمایوں نکلا تھا۔
اسی طرح، گزشتہ مہینے ہی، 20 ستمبر کو کراچی کے علاقے لسبیلہ فلمستان ٹاور کے قریب ایک گھر میں فائرنگ سے 35 سالہ گل اندام کو قتل کر دیا گیا تھا جب کہ اس کی 9 سالہ بچی نسرین زخمی ہو گئی تھی۔ پولیس کے مطابق مقتولہ کا شوہر جیسے ہی گھر سے سامان لینے نکلا، ایک نامعلوم شخص گھر میں داخل ہوا اور فائرنگ کر کے فرار ہو گیا۔
پولیس کے مطابق مقتولہ گزشتہ 6 ماہ سے اپنے شوہر کے ہمراہ کرائے کے مکان میں رہائش پذیر تھی، اس کا آبائی تعلق افغانستان سے تھا اور وہ اسماعیلی کمیونٹی سے تعلق رکھتی تھی۔ پولیس کا کہنا ہے کہ مقتولہ چند روز بعد اہل خانہ کے ہمراہ بیرون ملک روانہ ہونے والی تھی۔ زخمی بچی سے معلوم ہوا کہ فائرنگ کرنے والا شخص ان کا پرانا محلے دار تھا۔
By
By
