کراچی: شہر قائد کے علاقے گڈاپ میں کسٹمز اور انٹلیکچوئل پراپرٹی رائٹس انفورسمنٹ نے بڑی تعداد میں کاپی رائٹ کی خلاف ورزی کرتے ہوئے چھاپی گئی نصابی کتب اور مشہور عالمی برانڈز کے جعلی ہینڈ بیگز، بٹوے، گھڑیاں، جوتے اور کپڑے تلف کر دیے۔
کراچی میں کسٹمز اور انٹلیکچوئل پراپرٹی رائٹس انفورسمنٹ کی جانب سے جعلی اور پائریٹڈ اشیا کے خلاف ایک بڑا کریک ڈاوٴن کیا گیا ہے، جس میں 3 کروڑ 15 لاکھ روپے مالیت کی جعلی اور غیر قانونی اشیا کو مختلف کارروائیوں میں ضبط کیا گیا۔
کسٹمز حکام کے مطابق کروڑوں روپے مالیت کی غیر قانونی جعلی صنعتی مصنوعات، کاسمیٹکس، لگژری اشیا اور دیگر سامان تلف کر دیا گیا ہے، معروف عالمی برانڈز کے جعلی ہینڈ بیگز، بٹوے، گھڑیاں، جوتے اور ملبوسات بھی تلف کیے گئے۔
کسٹمز انفورسمنٹ کے مطابق غیر ملکی برانڈز کے نام سے تیار کردہ جعلی کاسمیٹکس اور پرسنل کیئر مصنوعات بھی ضبط کی گئی تھیں، گڈاپ کے علاقے میں کاپی رائٹ کی خلاف ورزی پر جعلی اور کاپی شدہ نصابی کتب بھی تلف کر دی گئیں۔
ڈائریکٹر انٹلیکچوئل پراپرٹی رائٹس انفورسمنٹ منیزہ ماجد کا کہنا ہے کہ معروف پبلشرز کی کتابوں کی پائریسی سے مصنفین، پبلشرز اور شعبہ تعلیم متاثر ہوتا ہے، جعلی اور پائریٹڈ اشیا صارفین، کاروباری اداروں اور ملکی معیشت کے لیے نقصان دہ ہیں۔
انھوں نے کہا جعلی کاسمیٹکس اور صنعتی مصنوعات عوامی صحت اور سلامتی کے لیے خطرہ بن سکتی ہیں، اس لیے جعلی مصنوعات اور پائریسی کے خلاف سخت قانونی کارروائی جاری رکھنے کا فیصلہ کیا گیا ہے۔
منیزہ ماجد کے مطابق جعلی مصنوعات اور پائریسی کے خلاف انٹلیکچوئل پراپرٹی رائٹس انفورسمنٹ اور کسٹمز کا تعاون جاری رکھا جائے گا۔
By
By
