جے ڈی وینس کی اہلیہ نومولود بیٹے سمیت ہیلی کاپٹر سے اترتے ہوئے حادثے سے بال بال بچ گئیں

نیویارک امریکی نائب صدر جے ڈی وینس کی اہلیہ اوشا وینس اپنے نومولود بیٹے سمیت ہیلی کاپٹر سے اترتے ہوئے لڑکھڑا گئیں، تاہم انہوں نے فوری طور پر توازن برقرار رکھتے ہوئے خود کو سنبھال لیا۔

اوشا وینس میری لینڈ کے جوائنٹ بیس اینڈریوز پر ہیلی کاپٹر سے اتر رہی تھیں، جہاں سے انہیں اپنے شوہر جے ڈی وینس کے ہمراہ وسط مدتی انتخابات سے قبل انتخابی مہم کے سلسلے میں الاسکا روانہ ہونا تھا۔

سوشل میڈیا پر وائرل ہونے والی ویڈیو میں اوشا وینس کو ہیلی کاپٹر سے اترتے ہوئے سیڑھیوں پر لڑکھڑاتے دیکھا جا سکتا ہے۔ اس وقت ان کی گود میں 9 ہفتوں کا بیٹا الیک نیل وینس موجود تھا، جسے انہوں نے بیبی کیریئر کے ذریعے اپنے جسم کے ساتھ باندھ رکھا تھا۔

تاہم اوشا وینس نے فوری طور پر اپنا توازن بحال کرلیا، مسکراتے ہوئے خود کو سنبھالا اور اپنے بچے کو تسلی دی۔

بعد ازاں جے ڈی وینس بھی ہیلی کاپٹر سے اترے، جبکہ ان کی 4 سالہ بیٹی میرابیل ان کی گود میں تھیں۔ اس کے بعد جے ڈی وینس اپنے اہلِ خانہ کے ہمراہ انتظار میں موجود طیارے کی جانب روانہ ہوئے، جو انہیں الاسکا کے شہر اینکریج لے جانے والا تھا۔

خیال رہے کہ جے ڈی وینس کے چوتھے بچے الیک کی پیدائش رواں سال 19 جولائی کو میری لینڈ کے شہر بیتھزڈا میں ہوئی تھی۔ جے ڈی وینس اور اوشا وینس کے دیگر بچوں میں 9 سالہ بیٹا ایون، 6 سالہ بیٹا وویک اور 4 سالہ بیٹی میرابیل شامل ہیں۔