نئی دہلی میں الیکشن کمیشن کے خلاف اپوزیشن کا احتجاج، راہول گاندھی گرفتار، بعد ازاں رہا

نئی دہلی (مانیٹرنگ ڈیسک) — بھارتی دارالحکومت نئی دہلی میں الیکشن کمیشن کے خلاف اپوزیشن جماعتوں کے احتجاج کے دوران پولیس نے کانگریس رہنما راہول گاندھی اور پریانکا گاندھی کو حراست میں لے لیا، تاہم کچھ دیر بعد دونوں کو رہا کردیا گیا۔

غیر ملکی میڈیا رپورٹس کے مطابق بھارت میں ووٹر فہرستوں میں مبینہ تبدیلیوں کے خلاف احتجاج جاری ہے، جبکہ اپوزیشن جماعتیں چیف الیکشن کمشنر سے استعفے کا مطالبہ کر رہی ہیں۔

’’جنگ‘‘ کے مطابق راہول گاندھی، پریانکا گاندھی اور دیگر اپوزیشن رہنماؤں نے پارلیمنٹ سے الیکشن کمیشن کے دفتر تک احتجاجی مارچ کرنے کی کوشش کی۔

پولیس نے الیکشن کمیشن ہیڈکوارٹرز کی جانب جانے والے راستے بند کر دیے، جس پر مظاہرین نے رکاوٹیں ہٹانے کی کوشش کی۔ اس دوران راہول گاندھی رکاوٹوں پر چڑھ گئے۔

پولیس نے مظاہرین کو آگے بڑھنے سے روکنے کے لیے راہول گاندھی اور پریانکا گاندھی کو حراست میں لے لیا، تاہم تھوڑی دیر بعد دونوں کو رہا کردیا گیا۔