رضوان کا ایک بار پھر اپنے خلاف الزامات کے حوالے سے این سی سی آئی اے کو خط لکھنے کا فیصلہ

قومی کرکٹ ٹیم کے وکٹ کیپر بیٹر اور سابق کپتان محمد رضوان نے ایک بار  پھر اپنے خلاف الزامات کے حوالے سے نیشنل سائبر کرائم انویسٹی گیشن ایجنسی (این سی سی آئی اے) کو خط لکھنے کا فیصلہ کیا ہے۔

ذرائع کا کہنا ہے محمد رضوان نے ایک بار پھر این سی سی آئی اے سے رابطہ کرنے کا فیصلہ کیا ہے، رضوان این سی سی آئی اے سے اپنے خلاف الزامات کے حوالے سے ایک بار پھر سوالات پوچھنے کے لیے خط لکھیں گے۔

ذرائع کے مطابق خط میں رضوان این سی سی آئی اے سے اپنے حوالے سے عدم تعاون کی افواہوں کے بارے میں بھی پوچھیں گے۔
ذرائع کا بتانا ہے کہ رضوان نے پہلی پیشی پر اپنے موبائل تک رسائی این سی سی آئی اے کو دے دی تھی، رضوان نے پہلی ہی پیشی پر اپنے آئی فون کا پاسورڈ این سی سی آئی اے کو دے دیا تھا، پہلی پیشی کے بعد رضوان کو تاحال این سی سی آئی اے کی جانب سے کوئی نوٹس موصول نہیں ہوا۔

ذرائع کا کہنا ہے رضوان کو تاحال این سی سی آئی اے نے تحریری طور پر عدم تعاون کے حوالے سے بھی آگاہ نہیں کیا، رضوان تعاون کرنے کے لیے تیار ہیں لیکن این سی سی آئی اے سے اپنے اوپر لگائے گئے الزامات کی تحریری تفصیلات چاہتے ہیں۔

خیال رہے کہ این سی سی آئی اے محمد رضوان اور امام الحق کے خلاف تحقیقات کر رہا ہے اور ذرائع کے مطابق این سی سی آئی اے کی جانب سے کرکٹرز کی مبینہ مشتبہ ٹرانزیکشن پر فوکس کیا جا رہا ہے۔