سہیل آفریدی اور علی امین گنڈاپور کے درمیان اہم ملاقات

پشاور (27 ستمبر 2026): وزیراعلیٰ خیبر پختونخوا سہیل آفریدی نے سابق وزیراعلیٰ کے پی علی امین گنڈاپور سے اہم ملاقات کی ہے۔

وزیراعلیٰ خیبر پختونخوا سہیل آفریدی ڈیرہ اسماعیل خان پہنچے جہاں سابق وزیراعلیٰ علی امین گنڈاپور نے ان کا استقبال کیا۔

موجودہ اور سابق وزرائے اعلیٰ نے گزشتہ روز درازندہ خودکش حملے کے زخمیوں کی عیادت کی، ان کی خیریت دریافت کی اور اسپتال حکام کو زخمیوں کے علاج کے لیے تمام تر طبی سہولتوں کی فراہمی کی ہدایت بھی کی۔

اسپتال کے دورے کے دوران سہیل آفریدی اور علی امین گنڈاپور نے زخمیوں کی صحت اور علاج معالجے کے حوالے سے ڈاکٹروں سے بریفنگ لی۔

بعد ازاں سہیل آفریدی، علی امین گنڈاپور کے ہمراہ ان کی رہائشگاہ گئے، جہاں اہم سیاسی امور اور دہشتگردی کی صورتحال پر تبادلہ خیال کیا گیا۔