صدر ٹرمپ: ایران کی صورتحال انتہائی خراب، معلوم نہیں تہران ہتھیار ڈالے گا یا نہیں

واشنگٹن: امریکی صدر ڈونلڈ ٹرمپ نے کہا ہے کہ ایران کی صورتحال انتہائی خراب ہے اور انہیں معلوم نہیں کہ تہران ہتھیار ڈالنے والا ہے یا نہیں۔

وائٹ ہاؤس میں مصنوعی ذہانت (اے آئی) سے متعلق رہنماؤں سے ملاقات کے بعد میڈیا سے گفتگو کرتے ہوئے ڈونلڈ ٹرمپ نے کہا کہ امریکا کو مصنوعی ذہانت کے میدان میں نمایاں برتری حاصل ہے اور وہ اسے برقرار رکھنا چاہتا ہے۔

ایران کی صورتحال سے متعلق سوال پر امریکی صدر نے کہا کہ حالات بہت خراب ہیں اور یہ واضح نہیں کہ ایران ہتھیار ڈالنے والا ہے یا نہیں۔ انہوں نے مزید کہا کہ جب تک وہ صدر ہیں، شمالی کوریا کے رہنما کم جونگ اُن ٹھیک رہیں گے۔

اس موقع پر ڈونلڈ ٹرمپ نے ٹیکنالوجی کے عہدیداروں کے ساتھ مصنوعی ذہانت سے متعلق ایک دستاویز پر دستخط بھی کیے۔ انہوں نے اسے تحفظ کی ایک شکل قرار دیتے ہوئے کہا کہ حکومت اے آئی کی نگرانی کے لیے ایک کمیٹی تشکیل دینے پر غور کر رہی ہے۔

امریکی صدر نے مزید کہا کہ ملاقات میں ڈیٹا سینٹرز کے قیام کے لیے موزوں مقامات پر بھی تبادلہ خیال کیا گیا۔ ان کا کہنا تھا کہ جن علاقوں میں ڈیٹا سینٹرز تعمیر کیے جائیں گے، وہاں کے لوگوں کو مالی طور پر نمایاں فائدہ ہوگا۔