پاسپورٹ، قومی شناختی کارڈ اور اسلحہ لائسنس بنوانے والوں کی بڑی پریشانی ختم ہوگئی

کراچی: شہریوں کو اب ایک ہی چھت تلے پاسپورٹ، قومی شناختی کارڈ ، نادرا ڈائریکٹ، اسلحہ لائسنس اور این او سیز سمیت تمام اہم سہولیات میسر ہوں گی۔

تفصیلات کے مطابق وفاقی وزارتِ داخلہ کے زیرِ انتظام ملک کا سب سے بڑا “گرینڈ خدمت مرکز” کراچی میں قائم کرنے کا اعلان کردیا گیا۔

یہ اہم فیصلہ وفاقی وزیر داخلہ محسن نقوی کے آئی آئی چندریگر روڈ پر واقع وزارتِ داخلہ کے دفتر کے دورے کے موقع پر سامنے آیا۔

وفاقی وزیر داخلہ محسن نقوی کا کہنا تھا کہ اس جدید گرینڈ خدمت مرکز میں وزارتِ داخلہ کے تمام ذیلی اداروں کے خصوصی کاؤنٹرز قائم کیے جائیں گے، جس کے نتیجے میں کراچی کے شہریوں کو ایک ہی چھت تلے پاسپورٹ، قومی شناختی کارڈ ، نادرا ڈائریکٹ، اسلحہ لائسنس اور این او سیز سمیت تمام اہم سہولیات میسر ہوں گی۔
محسن نقوی نے آئندہ 10 دنوں کے اندر گرینڈ خدمت مرکز کا تفصیلی ماسٹر پلان طلب کر لیا ہے۔

انہوں نے ہدایت کی ہے کہ خدمت مرکز کا ماسٹر پلان شہریوں کی تمام تر ضروریات اور جدید تقاضوں کو مدِ نظر رکھتے ہوئے تیار کیا جائے۔

وزیر داخلہ نے جدید خدمت مرکز کے جلد از جلد قیام کے لیے تمام متعلقہ انتظامی و تکنیکی اقدامات فوری طور پر مکمل کرنے کے احکامات جاری کر دیے ہیں۔