پاکستان سے بیرونِ ملک سفر کرنے والے مسافروں کیلئے نئی شرط عائد

اسلام آباد : بیرون ملک جانے والے مسافروں کی روانگی سے قبل سفری دستاویز کی جانچ پڑتال اور پری امیگریشن کلیئرنس” حاصل کرنے کے بعد ہی بیرونِ ملک کے لیے روانہ ہو سکیں گے۔

تفصیلات کے مطابق پاکستان سے بیرونِ ملک جانے والے مسافروں کو ایئرپورٹس پر آف لوڈنگ، مالی نقصان اور قانونی پیچیدگیوں سے محفوظ رکھنے کے لیے روانگی سے قبل ہی سفری دستاویزات کی سخت جانچ پڑتال کا عمل شروع کر دیا گیا ہے۔

اوورسیز ایمپلائمنٹ ایسوسی ایشن کی خصوصی درخواست پر اٹھائے گئے اس قدم کے تحت ملک بھر کے تمام ایئرپورٹس پر فیڈرل انویسٹی گیشن ایجنسی (ایف آئی اے)، ڈائریکٹوریٹ آف پاسپورٹ اور پروٹیکٹر اینڈ امیگرنٹس کا عملہ مکمل طور پر متحرک کر دیا گیا ہے۔
نئے طریقہ کار کے تحت مسافر اب ایف آئی اے امیگریشن سے “پری امیگریشن کلیئرنس” حاصل کرنے کے بعد ہی بیرونِ ملک کے لیے روانہ ہو سکیں گے۔

ایئرپورٹ حکام کا کہنا ہے کہ اس اقدام کا بنیادی مقصد ویزوں اور دیگر تمام متعلقہ کاغذات کی پیشگی اسکریننگ کو یقینی بنانا ہے تاکہ مسافروں کو آخری لمحے میں آف لوڈنگ کی وجہ سے پیدا ہونے والے معاشی و نفسیاتی دباؤ اور کسی بھی قسم کے قانونی مسائل سے بچایا جا سکے۔