امریکا میں 21 سالہ خاتون ایک اپارٹمنٹ بلڈنگ کی 8 ویں منزل کی کھڑکی سے گرنے کے باوجود کرشماتی طور پر زندہ بچ گئی۔
یہ واقعہ امریکی ریاست جارجیا کے شہر ایتھنز میں سامنے آیا۔
21 سالہ کرسٹین سارجنٹ جارجیا یونیورسٹی میں زیرتعلیم ہیں اور وہ 26 ستمبر کو ایک اپارٹمنٹ بلڈنگ کے اندر موجود تھیں۔
عینی شاہدین نے پولیس کو بتایا کہ یہ خاتون 8 ویں منزل پر واقع اپارٹمنٹ میں ایک کھلی کھڑکی کے قریب صوفے پر رقص کر رہی تھیں جب وہ پھسل کر باہر جا گریں۔
یہ خاتون وہاں سے نیچے اس عمارت کی دوسرے منزل پر موجود احاطے میں واقع ایک پول کے قریب گری۔
پولیس نے ایسے شواہد دریافت کیے جن سے عندیہ ملتا ہے کہ کرسٹین سارجنٹ گرنے کے بعد ایک دھاتی بینچ سے ٹکرائی تھیں۔
اس بینچ کے کشن پر خون کے دھبے ملے جبکہ بینچ کو نقصان بھی پہنچا۔
مقامی پولیس نے بتایا کہ ہمارا ماننا ہے کہ اس بینچ نے خاتون کے گرنے کے عمل کو روکنے میں مدد فراہم کی۔
پولیس کے مطابق یہ کوئی مجرمانہ معاملہ نہیں کیونکہ خاتون مکمل ہوش میں تھیں۔
خاتون کے دوستوں نے ایمرجنسی سروسز سے رابطہ کرتے ہوئے بتایا تھا کہ ان کی دوست کھڑکی سے باہر گر کر بے حس و حرکت زمین پر پڑی ہے۔
خاتون کو اسپتال منتقل کیا گیا اور پولیس نے اسے حادثہ قرار دیا۔
پولیس کے مطابق کرسٹین سارجنٹ اسی عمارت میں رہتی ہیں جبکہ خاتون کے رشتے داروں نے تصدیق کی ہے کہ وہ تیزی سے صحت یاب ہو رہی ہیں۔
کرسٹین سارجنٹ کی بہن نے کہا کہ وہ شکر گزار ہیں کہ ان کی بہن کی زندگی بچ گئی۔
By
By
