مقامی حکومتوں کا بل منظور کرانے کے لیے حکومت اسلام آباد میں سرگرم

اسلام آباد (3 ستمبر 2026): قومی اسمبلی کی داخلہ کمیٹی کا اجلاس آج ہو رہا ہے حکومت اسلام آباد میں مقامی حکومتوں کا بل پاس کروانے کے لیے متحرک ہو گئی۔

اے آر وائی نیوز کے مطابق قومی اسمبلی کی داخلہ کمیٹی کے آج ہونے والے اجلاس سے قبل حکومت وفاقی دارالحکومت اسلام آباد میں مقامی حکومتوں کا بل پاس کروانے کے لیے متحرک ہو گئی ہے۔

پیپلز پارٹی کی جانب سے بل کی حمایت سے انکار کے بعد دیگر اراکین سے حکومت نے رابطے شروع کر دیے ہیں۔

اس سلسلے میں وفاقی وزیر پارلیمانی امور طارق فضل چوہدری نے کمیٹی اراکین کو فون کر کے آج کےاجلاس میں شرکت ہر حال میں یقینی بنانے کی ہدایت کی ہے۔

اپوزیشن جماعت تحریک انصاف پہلے ہی کمیٹیوں کا بائیکاٹ کیے ہوئے ہے جب کہ ذرائع کا کہنا ہے پیپلز پارٹی بھی آج داخلہ کمیٹی کے اجلاس میں نہیں آئے گی۔

دوسری جانب حکومت کی جانب سے دعویٰ کیا گیا ہے کہ 20 رکنی کمیٹی میں حکومت کو پیپلز پارٹی کے بغیر بھی سادہ اکثریت حاصل ہے۔