خاتون یوٹیوبر کو دولت کی نمائش مہنگی پڑگئی، چور گھر سے 81 تولے سونا اور لاکھوں روپے لے اڑے

بھارتی ریاست تامل ناڈو میں سوشل میڈیا پر دولت کی نمائش ایک سنگین سکیورٹی خطرے میں بدل گئی جہاں بھارت کی معروف یوٹیوبر مدھومیتا کے گھر سے تقریباً ایک  کروڑ روپے مالیت کے سونے اور  ہیرے کے زیورات سمیت نقدی چوری کرلی گئی۔ 

میڈیا رپورٹس کے مطابق واردات ضلع کنیاکماری کے علاقے ناگرکوئل کے وی آئی پی گارڈن میں پیش آئی جہاں معروف یوٹیوبر مدھومیتا اپنے شوہر ونود کمار اور ایک بچے کے ساتھ رہائش پذیر ہیں،  ونود کمار پیشے کے اعتبار سے الائچی کے تاجر ہیں۔

ابتدائی تحقیقات  سے پتا چلتا ہے کہ واردات میں ملزمان نے متاثرہ خاتون کی اپنی ویڈیوز اور آن لائن سرگرمیوں سے حاصل معلومات کو استعمال کرتے ہوئے منصوبہ بندی کی، چوروں نے یوٹیوبر کے سوشل میڈیا پر’ میں کہاں رہتی ہوں‘  جیسے  سوالات کے جوابات سے لوکیشن حاصل کی۔
 رپورٹ کے مطابق متاثرہ جوڑا  جیولری اور کیش کے ہمراہ ویڈیو ز سوشل میڈیا پر پوسٹ کرتا تھا۔

رپورٹ کے مطابق واردات کے روز مدھومیتا اپنے اہل خانہ کے ہمراہ کپڑوں کی خریداری کے لیے گھر سے باہر گئی تھیں، اس دوران نامعلوم چوروں نے گھر کے پچھلے دروازے کو کاٹ کر اندر داخل ہونے کا راستہ بنایا،   واردات کے دوران چور   یوٹیوبر کے گھر سے  81 تولہ سونا اور لاکھوں روپے  لے کر فرار ہوگئے۔