حکومت اور پی ٹی آئی کے درمیان برف پگھلنے کا امکان، آج اہم ملاقات متوقع

اسلام آباد : چیئرمین پی ٹی آئی بیرسٹر گوہر خان آج اسپیکر قومی اسمبلی سردار ایاز صادق سے اہم ملاقات کریں گے۔

تفصیلات کے مطابق ملک کی موجودہ سیاسی صورتحال کے پیش نظر حکومت اور پاکستان تحریک انصاف (پی ٹی آئی) کے درمیان تعطل کا شکار مذاکرات کی بحالی کی امیدیں پیدا ہو گئیں۔

اس سلسلے میں چیئرمین پی ٹی آئی بیرسٹر گوہر خان آج اسپیکر قومی اسمبلی سردار ایاز صادق سے اہم ملاقات کریں گے۔

ذرائع نے بتایا کہ یہ اہم ملاقات پارلیمنٹ ہاؤس کے اسپیکر چیمبر میں ہو گی، جس میں ملک کی مجموعی سیاسی صورتحال اور پارلیمانی امور پر تفصیلی گفتگو کی جائے گی
ملاقات کے دوران بیرسٹر گوہر پی ٹی آئی کے گرفتار ارکانِ پارلیمنٹ کا معاملہ اسپیکر کے سامنے اٹھائیں گے اور ان کی رہائی یا پارلیمانی حقوق کے حوالے سے بات چیت کریں گے۔

اس کے علاوہ حکومت اور پی ٹی آئی کے درمیان باقاعدہ مذاکرات کی بحالی کے حوالے سے بھی مشاورت کی جائے گی۔

ذرائع کا بتانا ہے کہ تحریک انصاف نے دونوں فریقین کے درمیان بات چیت کے عمل کو دوبارہ شروع کرنے اور سیاسی تناؤ کم کرنے کے لیے اسپیکر قومی اسمبلی سردار ایاز صادق سے کردار ادا کرنے اور مدد کی درخواست کی ہے۔