ایم ڈی کیٹ کے نتائج کو کالعدم قرار دے کر آزادانہ انکوائری کرانے کا مطالبہ

کراچی : ایم کیو ایم نے ایم ڈی کیٹ رزلٹ کو کالعدم قرار دے کر آزادانہ انکوائری کرانے کا مطالبہ کردیا۔

تفصیلات کے مطابق متحدہ قومی موومنٹ (ایم کیو ایم) پاکستان نے ایم ڈی کیٹ 2026ء کے انعقاد اور نتائج پر شدید تحفظات کا اظہار کرتے ہوئے موجودہ رزلٹ کو کالعدم قرار دینے اور شفاف و آزادانہ تحقیقات کا مطالبہ کر دیا۔

ایم کیو ایم پاکستان کے رکن سندھ اسمبلی انجینئر عادل عسکری نے وزیراعلیٰ سندھ کو لکھے گئے ایک مکتوب (خط) کے ذریعے ایم ڈی کیٹ امتحان اور اس کے نتائج پر سنگین سوالات اٹھا دیے ہیں۔

خط میں نشاندہی کی گئی ہے کہ سکھر آئی بی اے ٹیسٹنگ سروس کے تحت منعقدہ ایم ڈی کیٹ 2026ء کے امتحان اور نتائج سے متعلق طلبہ و ان کے والدین کی جانب سے شدید خدشات اور شکایات سامنے آئی ہیں۔

موجودہ ایم ڈی کیٹ نتائج کو فوری طور پر کالعدم قرار دیا جائے، تمام امتحانی مراکز کی سی سی ٹی وی ریکارڈنگز کا تفصیلی جائزہ لیا جائے اور اسکیننگ کے عمل کے ریکارڈ کو محفوظ بنایا جائے۔
اصل جوابی کاپیوں اور او ایم آر شیٹس کے رینڈم سیمپلز کی آزادانہ اور غیر جانبدارانہ انداز میں دوبارہ چیکنگ کی جائے۔

ایم ڈی کیٹ کے پورے پروسیس کا آڈٹ کرایا جائے اور اس بات کی تحقیقات کی جائیں کہ مقررہ طریقہ کار پر عملدرآمد ہوا یا نہیں۔

مستقبل میں ایسے اہم امتحانات کے شفاف انعقاد کے لیے آزاد پیشہ ورانہ امتحانی ادارہ قائم کرنے کی تجویز دی گئی ہے، جبکہ برٹش کونسل اور نجی یونیورسٹیوں کے طرز کا شفاف امتحانی نظام اپنایا جائے.