ایلون مسک نے اپنے چار بچوں کی والدہ شیون زِلس سے رشتہ ختم کر لیا

ارب پتی کاروباری شخصیت ایلون مسک کی سابقہ پارٹنر شیون زِلس نے انکشاف کیا ہے کہ ان کا تعلق اچانک ختم ہو گیا۔

شیون زِلس نے سوشل میڈیا پلیٹ فارم ایکس پر ایک جذباتی پوسٹ کے ذریعے علیحدگی کے بارے میں بتایا اور مبینہ طور پر ایلون مسک کے ساتھ ہونے والی آخری گفتگو کے اسکرین شاٹس بھی شیئر کیے۔

انہوں نے اپنی پوسٹ میں کہا کہ صرف ایک ہفتے کے دوران محبت سے کسی کو رخصت کرنے تک کا سفر ان کے لیے مشکل رہا، تاہم بعض اوقات زندگی اسی طرح کے حالات سے دوچار کرتی ہے۔

شیون نے علیحدگی پر افسوس کا اظہار کرتے ہوئے کہا کہ وہ اب بھی ایلون مسک کی بہت پروا کرتی ہیں اور ہمیشہ ان کی خوشی کی خواہش رکھیں گی۔

واضح رہے کہ ایلون مسک اور شیون زِلس کے چار بچے ہیں۔ ان میں 2021 میں پیدا ہونے والے جڑواں بچے اسٹرائیڈر اور ایزور، 2024 میں پیدا ہونے والی بیٹی آرکیڈیا اور بیٹا سیلڈن شامل ہیں۔