سعودی عرب نے ایشیائی ممالک کے لیے خام تیل کی قیمتوں میں بڑی کمی کردی

ریاض سعودی عرب نے نومبر کے لیے ایشیا کو فراہم کیے جانے والے خام تیل کی قیمتوں میں غیر متوقع طور پر نمایاں کمی کردی ہے۔

سعودی عرب کے اس اقدام کے بعد ایشیا کے لیے خام تیل کی قیمتیں 6 سال کی کم ترین سطح پر آگئی ہیں، جبکہ اس کے برعکس شمال مغربی یورپ اور بحیرۂ روم کے خطے کے لیے خام تیل کی قیمتوں میں اضافہ کیا گیا ہے۔

غیر ملکی خبر رساں ایجنسی کے مطابق سعودی تیل کمپنی آرامکو نے نومبر کے لیے ایشیا کو فراہم کیے جانے والے عرب لائٹ خام تیل کی سرکاری قیمتِ فروخت عمان اور دبئی کی اوسط قیمت سے 5 ڈالر فی بیرل کم مقرر کی ہے، جو گزشتہ ماہ کے مقابلے میں 3 ڈالر فی بیرل کم ہے۔

اس کے علاوہ آرامکو نے ایشیا کو برآمد کیے جانے والے دیگر خام تیل کے گریڈز، عرب میڈیم اور عرب ہیوی، کی نومبر کی سرکاری قیمتوں میں بھی 5 ڈالر فی بیرل کمی کردی ہے۔