نئی دہلی— بھارتی ریاست گجرات میں تیز رفتار گاڑی سڑک کنارے کھڑے ٹریلر سے ٹکرا گئی، حادثے میں 7 افراد ہلاک ہوگئے۔

بھارتی میڈیا کے مطابق حادثہ گزشتہ روز گجرات کے ضلع بھاونگر میں پیش آیا، جہاں تیز رفتار گاڑی ہائی وے سے ملحقہ سروس روڈ پر کھڑے ٹریلر سے ٹکرا گئی۔ حادثے کا شکار ہونے والے افراد بھاونگر سے الانگ جا رہے تھے، جہاں وہ ایک شپ یارڈ میں کام کرتے تھے۔

پولیس کے مطابق حادثہ صبح تقریباً 10 بجے بھاونگر-سومناتھ نیشنل ہائی وے سے ملحقہ سروس روڈ پر پیش آیا۔ ٹریلر سڑک کنارے کھڑا تھا جبکہ پیچھے سے آنے والی گاڑی بے قابو ہوکر ٹریلر کے پچھلے حصے سے جا ٹکرائی۔

حادثے کے نتیجے میں 6 افراد موقع پر ہی ہلاک ہوگئے جبکہ ایک شخص دورانِ علاج دم توڑ گیا۔

عینی شاہدین کے مطابق تصادم اتنا شدید تھا کہ ٹریلر آگے کی جانب کھسک گیا جبکہ گاڑی مکمل طور پر تباہ ہوگئی۔ حادثے کے بعد لاشیں سڑک پر بکھر گئیں۔