لاہور میں غیر ملکی لڑکی سے مبینہ اجتماعی زیادتی، مقدمہ درج

لاہور کے علاقے ڈیفنس میں غیر ملکی لڑکی سے مبینہ اجتماعی زیادتی کا مقدمہ درج کرلیا گیا۔

ڈی آئی جی انویسٹی گیشن لاہور ذیشان رضا نے کہا ہے کہ ڈیفنس میں غیر ملکی لڑکی سے مبینہ اجتماعی زیادتی کے ملزمان کی شناخت کرلی گئی ہے، ملزمان کی گرفتاری کیلئے خصوصی ٹیمیں بھی تشکیل دے دی گئی ہیں۔
ڈی آئی جی انویسٹی گیشن کےمطابق خصوصی ٹیموں کی سربراہی ایس پی انویسٹی گیشن کینٹ عاصم افتخار کریں گے، ملزمان کی شناخت کر لی ہے ، ان کی گرفتاری کے لیے تمام وسائل بروئےکار لائے جا رہے ہیں اور ملزمان کو کیفرکردار تک پہنچایا جائے گا۔

پولیس کے مطابق آذربائیجان سے تعلق رکھنے والی 20 سالہ ڈیانا چند روز قبل لاہور آئی تھی جسے 2 نامعلوم لڑکیاں ورغلا کر پہلے کیفے لے گئیں جہاں ان کے تین دوست موجود تھے، ملزمان نے غیر ملکی لڑکی کو نشہ اور چیز پلا کر مبینہ طور  پر اجتماعی زیادتی کا نشانہ بنایا اور بعد میں ائیر پورٹ کے قریب چھوڑ کر فرار ہو گئے تھے۔