چھ سالہ رسیل متعدد سنگین زخموں کا شکار ہے، جن میں ٹانگ کی ہڈی کا ٹوٹ جانا، دماغ میں شیل کا ٹکڑا پیوست ہونا اور جسم پر ایسے زخم شامل ہیں جو اینٹی بایوٹکس کے استعمال کے باوجود ٹھیک نہیں ہو رہے۔

غزہ: زخمی بچی رسیل کے زخم اینٹی بایوٹکس سے بھی مندمل نہ ہو سکے، علاج میں مشکلات برقرار

غزہ کے ناصر ہسپتال میں 6 سالہ رسیل شدید زخمی حالت میں زیر علاج ہے، جس کی دائیں ٹانگ ٹوٹ چکی ہے، ہاتھ اور ٹانگوں پر گہرے زخموں میں انفیکشن ہے جبکہ دماغ میں دھاتی ٹکڑا بھی پیوست ہے۔

ڈاکٹروں کے مطابق رسیل کو زخم بند کرنے کے لیے جلد کی پیوند کاری کی ضرورت ہے، تاہم انفیکشن کے باعث یہ عمل ممکن نہیں ہو پا رہا۔ دستیاب اینٹی بایوٹکس بھی ان زخموں پر مؤثر ثابت نہیں ہو رہیں، جس کے باعث ڈاکٹروں کو زخم بار بار کھول کر صاف کرنا پڑ رہے ہیں۔

رسیل کے علاج پر مامور ڈاکٹر عونی الجعفراوی کے مطابق بچی کے زخموں میں ایسے بیکٹیریا پائے گئے ہیں جو کئی اقسام کی اینٹی بایوٹکس کے خلاف مزاحمت رکھتے ہیں۔ ڈاکٹروں کو اب تک اس کے زخم 20 سے زائد مرتبہ صاف کرنا پڑے ہیں۔

رسیل 30 جولائی کو خان یونس کے قریب المواسی کیمپ میں اپنے خاندان کے ساتھ موجود تھی، جہاں ایک فضائی حملے میں اس کا خیمہ نشانہ بن گیا۔ واقعے میں اس کی 9 سالہ بہن رتیل اور 20 سالہ کزن ہلاک ہوئے، جبکہ رسیل کی والدہ اور بھائی بھی شدید زخمی ہوئے۔ اسرائیلی فوج کا کہنا ہے کہ اسے اس مخصوص وقت اور مقام پر کسی فضائی حملے کا ریکارڈ نہیں ملا۔

غزہ کے ہسپتالوں میں اینٹی بایوٹکس کے خلاف مزاحمت رکھنے والے انفیکشنز کے بڑھتے ہوئے کیسز نے طبی ماہرین کو تشویش میں مبتلا کر دیا ہے۔ ماہرین کے مطابق جنگ، صاف پانی کی قلت، ناقص نکاسیٔ آب، ادویات کی کمی اور صحت کے بنیادی ڈھانچے کی تباہی نے انفیکشنز کے پھیلاؤ کے خطرات میں اضافہ کیا ہے۔

ایک حالیہ تحقیق کے مطابق 2015 سے 2025 کے دوران غزہ کے 11 ہسپتالوں سے حاصل کیے گئے تقریباً 80 ہزار بیکٹیریائی نمونوں کا جائزہ لیا گیا، جس میں اہم اینٹی بایوٹکس کے خلاف بیکٹیریا میں بڑے پیمانے پر مزاحمت سامنے آئی۔ تاہم تحقیق ابھی ہم مرتبہ جائزے کے مرحلے سے نہیں گزری، اس لیے اس کے نتائج کو ابتدائی قرار دیا جا رہا ہے۔

دوسری جانب غزہ میں صاف پانی اور صفائی کی سہولیات کی شدید کمی بھی صورتحال کو مزید پیچیدہ بنا رہی ہے۔ خیمہ بستیوں کے اطراف کچرے، انسانی فضلے اور آلودہ پانی کے باعث چوہوں اور دیگر موذی جانوروں کی تعداد میں اضافہ ہوا ہے۔ ایک سروے کے مطابق بے گھر خاندانوں کے زیر استعمال 81 فیصد مقامات پر چوہے یا دیگر موذی جانور مسلسل دیکھے جاتے ہیں۔

طبی ماہرین کا کہنا ہے کہ اگر انفیکشن ہڈیوں تک پہنچ جائے تو اعضا کاٹنے کی ضرورت پیش آ سکتی ہے، جبکہ ایسے کیسز میں آنے والے برسوں میں مزید اضافہ ہونے کا خدشہ ہے۔

رسیل کی حالت اب بھی تشویشناک ہے۔ ڈاکٹروں کے مطابق اس کے دماغ میں موجود دھاتی ٹکڑے کو فی الحال محفوظ طریقے سے نکالنا ممکن نہیں، جبکہ وہ چلنے پھرنے سے بھی محروم ہو چکی ہے اور اسے دورے بھی پڑ رہے ہیں۔

تاہم ستمبر کے اواخر میں اسرائیلی حکام کی منظوری کے بعد رسیل اور اس کے والد کو مصر منتقل کر دیا گیا، جہاں عالمی ادارۂ صحت کی معاونت سے اس کا علاج جاری ہے۔ رسیل کے والد کو امید ہے کہ مصر میں ان کی بیٹی کو وہ بہتر طبی سہولیات مل سکیں گی جن کی اسے اشد ضرورت ہے۔

ناصر ہسپتال میں قیام کے دوران رسیل کی ایک کزن اس کے لیے گڑیا لے کر آئی تھی، جس کا نام رسیل نے اپنی جاں بحق بہن کی یاد میں ’’رتیل‘‘ رکھ دیا۔