پی ٹی آئی کے ممکنہ لانگ مارچ کے پیشِ نظر وزیراعظم شہباز شریف نے اہم اجلاس طلب کرلیا

اسلام آباد: پاکستان تحریکِ انصاف (پی ٹی آئی) کے ممکنہ لانگ مارچ کے معاملے پر وزیراعظم شہباز شریف نے اہم اجلاس طلب کر لیا۔

روزنامہ جنگ کے مطابق ذرائع کا کہنا ہے کہ اجلاس میں نائب وزیراعظم اسحاق ڈار، وفاقی وزیر داخلہ محسن نقوی اور وفاقی وزیر قانون اعظم نذیر تارڑ شرکت کریں گے۔ اجلاس کے دوران پی ٹی آئی کے ممکنہ لانگ مارچ سمیت خیبر پختونخوا میں امن و امان کی صورتحال کا جائزہ لیا جائے گا۔

ذرائع کے مطابق اجلاس میں خیبر پختونخوا کی آئندہ صورتحال سے متعلق مختلف آپشنز پر غور کیا جائے گا، جن میں گورنر راج اور ایمرجنسی کے نفاذ سمیت دیگر تجاویز بھی شامل ہیں۔

واضح رہے کہ گزشتہ روز بھی وزیراعظم شہباز شریف کی زیرِ صدارت ایک اعلیٰ سطحی مشاورتی اجلاس ہوا تھا، جس میں خیبر پختونخوا میں گورنر راج یا ایمرجنسی کے نفاذ سے متعلق مختلف آپشنز کا جائزہ لیا گیا۔

وزیراعظم ہاؤس میں ہونے والے اجلاس میں وفاقی وزراء اور دیگر اہم حکام نے شرکت کی۔ اجلاس میں خیبر پختونخوا سمیت ملک بھر میں امن و امان کی مجموعی صورتحال کا جائزہ لیا گیا۔

ذرائع کے مطابق وزیر داخلہ محسن نقوی نے اجلاس کے شرکاء کو امن و امان کی صورتحال پر بریفنگ دی، جبکہ پی ٹی آئی کی جانب سے لانگ مارچ کے اعلان اور بیک ڈور رابطوں سے متعلق بھی تبادلہ خیال کیا گیا۔