کراچی میں نومولود بچوں کی لاشیں ملنے کے واقعات میں تشویشناک اضافہ

راچی: شہر میں نومولود بچوں کی لاشیں ملنے کے واقعات میں تشویشناک اضافہ ہوا، رواں سال کے دوران تیرہ بچے اور سات بچیوں کی لاشیں ملی چکی ہیں۔

تفصیلات کے مطابق کراچی میں نومولود بچوں کی لاشیں ملنے کے تلخ اور دردناک واقعات میں روز بروز اضافہ ہوتا جا رہا ہے، جہاں گزشتہ دو روز کے دوران مختلف علاقوں سے مزید چار نومولود بچوں کی لاشیں برآمد ہوئی ہیں۔

ریسکیو حکام نے بتایا کہ گارڈن کے علاقے دھوبی گھاٹ اور کورنگی نمبر 5 میں ایک نجی اسپتال کے قریب سے دو نومولود بچوں کی لاشیں ملیں، جنہیں ضابطے کی کارروائی کے لیے تحویل میں لے کر سرد خانے منتقل کر دیا گیا ہے۔

گزشتہ روز کلفٹن کی ایک عمارت سے نومولود کو نیچے پھینکے جانے کا واقعہ پیش آیا جس کی سی سی ٹی وی فوٹیج بھی منظر عام پر آ چکی ہے۔
اس کے علاوہ سرجانی ٹاؤن کی جھاڑیوں سے بھی ایک بچے کی لاش ملی، جسے جنگلی جانوروں نے شدید نقصان پہنچایا تھا۔

ریسکیو ذرائع کی رپورٹ کے مطابق رواں سال اب تک شہر کے مختلف علاقوں سے کل 20 نومولود بچوں کی لاشیں برآمد ہو چکی ہیں، جن میں 13 لڑکے اور 7 لڑکیاں شامل ہیں۔

سماجی حلقوں اور شہریوں نے اس سنگین صورتحال پر شدید تشویش کا اظہار کرتے ہوئے حکام سے ان واقعات کی روک تھام اور ملوث عناصر کو قانون کے کٹہرے میں لانے کا مطالبہ کیا ہے۔