امریکا نے ایران کی وزارتِ دفاع کے لیے مبینہ طور پر اسلحہ اور عسکری سازوسامان کی خریداری میں معاونت کرنے والے عالمی نیٹ ورک کے خلاف کارروائی کرتے ہوئے پاکستانی کاروباری شخصیت وسیم پاشا تجمل، ان کی تین کمپنیوں اور مختلف ممالک سے تعلق رکھنے والے دیگر افراد و اداروں پر پابندیاں عائد کردی ہیں۔
امریکی محکمۂ خزانہ کے مطابق وسیم پاشا تجمل نجی دفاعی کمپنی کیولیئر گروپ کے چیئرمین ہیں، جس کے دفاتر اور کاروباری سرگرمیاں پاکستان سمیت مختلف ممالک میں موجود ہیں۔
امریکی حکام نے الزام عائد کیا ہے کہ وسیم پاشا تجمل اور کیولیئر گروپ ایران کی وزارتِ دفاع و مسلح افواج لاجسٹکس (MODAFL) کے لیے تیسرے فریق کے ذریعے کام کرنے والے ثالث کے طور پر خدمات انجام دیتے رہے ہیں۔ بیان کے مطابق تجمل نے اپنے پیشہ ورانہ روابط کو استعمال کرتے ہوئے ایران کی جانب سے اسلحے کی خریداری اور ترسیل میں معاونت کی۔
امریکی محکمۂ خزانہ کے مطابق وسیم پاشا تجمل پاکستان میں قائم کیولیئر ڈائنامکس پرائیویٹ لمیٹڈ کے اکثریتی شیئر ہولڈر اور چیف ایگزیکٹو افسر ہیں۔
وہ سعودی عرب میں قائم کیولیئر ڈائنامکس فار ٹیکنالوجیز کمپنی کے ڈائریکٹر بھی ہیں، جو مکمل طور پر کیولیئر ڈائنامکس پرائیویٹ لمیٹڈ کی ملکیت ہے۔ اس کے علاوہ وہ ترکی میں قائم کیولیئر ڈائنامکس ٹیکنالوجی تجارت اینونم شرکتی کے ڈائریکٹر اور واحد شیئر ہولڈر ہیں۔
امریکی محکمۂ خزانہ کا کہنا ہے کہ سعودی عرب میں قائم کیولیئر ڈائنامکس فار ٹیکنالوجیز کمپنی کے خلاف کارروائی سعودی حکام کے تعاون سے کی گئی۔
واشنگٹن کے مطابق وسیم پاشا تجمل نے MODAFL کو مالی، مادی اور تکنیکی معاونت فراہم کی یا اشیا اور خدمات فراہم کرنے میں معاونت کی۔ اسی بنیاد پر انہیں امریکی پابندیوں کی فہرست میں شامل کیا گیا، جبکہ ان کی تینوں کمپنیوں کو ان کی ملکیت یا کنٹرول میں ہونے کی بنیاد پر پابندیوں کا نشانہ بنایا گیا ہے۔
By
By
